BATA

Leron-leron sinta

Buko ng papaya

Dala-dala'y buslo

Sisidlan ng bunga

Pagdating sa dulo'y

Nabali ang sanga

Kapos palaranan

Humanap ng iba.

Isa 'yan sa paborito kong kantahin noon bata pa ako, sa katunayan nga, ginawaan ko pa yan ng sarili kong bersyon, pero hindi tungkol sa bersyon ko ang blog na'to.

Noon nasa elementary pa ako, laking tuwa ko kapag oras na ng kantahan at kapag nakakahalata na si titser na inaantok na kami.

"Okay, class...inaantok na ata  tayo, kantahan muna tayo ah? Everybody stands up." Sabi ni titser

Mag-uumpisa muna ang kantahan sa simpleng ngiti...

"Class, sampung palaka...1, 2, ready sing..." pag-uumpisa ni titser.

Sampung palaka, lumalangoy-langoy

pataas, pababa, paikot-ikot.

Ang sabi ng nanay,

 matulog na kayo,

ang sabi ng palaka,

ayaw ko, ayaw ko.

Ang sabi ng tatay,

kumain na kayo,

ang sabi ng palaka,

gusto ko, gusto ko.

"Oh, sabayan niyo ng sayaw...ulit pa..." sabi ni titser na natutuwa dahil sa nakakaaliw at nakakatuwa na sayaw namin.

Lima hanggang anim na taong gulang ang edad namin noon. Nanunumbalik ang kulit, sigla at tuwa namin pagkatapos kami pakantahin at pasayawin ni titser, kaya aliw na aliw din sa amin ang mga nakakakita lalo na ang si titser.

"Very good class, ang gagaling ninyo. Palakpakan natin ang atin mga sarili" sabi ni titser at lahat kami ay pumalakpak at nagtawanan.

Pagdating naman ng bahay, diretso na kay mama at papa para ipakita at ipagyabang ang mga natutunan na sayaw at kanta. Kaya ganoon din ang tuwa sa akin ng mga magulang ko, ipinagmamayabang din nila ako sa ibang tao.

Simpleng buhay bata, ang saya hindi ba?

Eh ito kaya...

Siguro alam mo na ang tungkol sa batang si Jan-jan na pinasayaw sa isang programa sa TV. Pinanood ko ito sa youtube kagabi, anim na taon din si Jan-jan, tulad namin noon na hilig din sayawin ang paboritong kanta.

Pero habang pinapanood ko ang video, nagtaka ako dahil naiba ang sayaw at kanta ng isang bata. Nakaramdam ako ng awa, hindi lang kay Jan-jan kundi pati sa mga magulang niya at sa mga nanonood na tuwang tuwa sa panggagaya ng isang anim na taon gulang na bata sa isang sayaw na malaswa. Ganun na ba tayo ngayon, natutuwa at pinapalakpakan ang ginagawang "hindi dapat" ng isang bata?

Nasaan ang kasabihan ni fafa Dr. Jose Rizal na "Ang kabataan ay ang pag-asa ng bayan? 'yun ba ang tinutukoy ng atin bayani? eh nasaan ang pagiging relihiyoso at pagiging mataas ng moral natin mga pilipino? Ganun ba 'yun?

May mga gawain na naaangkop lamang sa mga bata, at may mga gawain na naaangkop lamang sa amin ni Hayden K.

Hindi porket kagustohan ng bata ay ibibigay mo na, wala pang alam sa kamundohan ang mga bata, kaya nga nandito tayong mga matatanda para gabayan sila at ipaalam kung alin ang tama at ang hindi tama.

Halimbawa: Ang bata ay ayaw nilang natutulog tuwing tanghali dahil mas gusto nilang maglaro o manood nalang sa tv, diba hindi natin hinahayaan 'yun dahil lang sa gusto nila, e ang malaswa pa kaya, hindi ba?

Iba ang nakita ko habang pinapanood ang video ni Jan-jan na sumasayaw. Ang ngiti at halakhak ng isang bata ay napalitan ng mga luha at lungkot, at ang nakakatuwa at makulit na sayaw ng isang bata ay napalitan ng malaswang sayaw.

Ito lang masasabi ko, "HINDI AKO NAALIW MGA BALIW!"

Share