Guni-guning ligaw

Nandito ako ngayon sa paligid-ligid ng isang bahay kubo na puno ng linga, at mga sari-saring halaman. Sa likod nito ay may isang buko ng papaya, inakyat ko pero pagdating ko sa dulo ay nabali ang sanga, nahulog ako kaya nagkagalos ang sampung mga daliri ko, ang kamay at paa, pati dalawang taenga, pero salamat dahil wala naman sugat sa dalawang mata ko, at maganda parin ang ilong ko.

Malapit ang bahay kubo sa dagat kaya tumakbo ako doon para hugasan ang mga sugat ko, nabigla na naman ako sa aking nakita, mayroon mga alimango kaya tuwang-tuwa ako, sinubukan ko silang hulihin pero mahirap sapagkat nangangagat.

Lumayo ako sa mga alimango, pumunta naman ako sa dako paroon, sa may harden ng mga bulaklak na sumasara at bumubuka, nilakbay ng aking paningin ang buong harden ng mga bulaklak para hanapin ang reyna na papasok, wala naman. 

Mga paru-parong bukid lang na lilipad-lipad ang nakita ko, sinubukan ko silang hulihin pero sadyang mailap sila, parang pag-ibig. Napagod ako sa kakahabol sa mga paru-paro, kaya umupo muna ako sa gilid ng balong malalim sa may gitna ng harden, sinilip ko ang balon at nakita ko ang sampung palaka na lumalangoy-langoy, pataas pababa, paikot-ikot, pero hindi ko narinig ang sabi ng kanilang nanay at tatay.

Huminga nalang ako ng malalim, tumingala sa langit. Pinikit ko ang aking mga mata, pagdilat ko umagang kay ganda na pala.

Share